Anonymous.tn

السلام عليكم
اسمي علي بالحاج خليفة
من مساكن
أستاذ إعلامية
صاحب رقم 22425837
الي يظهرلي أصبح أشهر رقم في تونس
يامس معا 1 متاع الصباح
تلقيت العديد من المكالمات من تونس و من خارج تونس
مكالمات كان فاها برشا سبان و تهديدات بالتصفية
من اللول ،ما فهمتش السبب
ما فهمت كان مع ال4 متاع الصباح
كيف لقيت بعض الصفحات على الفايسبوك مخرجة معطيات تخصني، و تتهم فيا كوني من منظمة أنونيموس،
و كوني آني هو الضيف المقنع لبرنامج اليوم الثامن على قناة التونسية، الي حكا فيه على الحوت و السردينة و البوري و المرجان و ما نعرفش شنوة
باهي
نحب نوضح حاجة للشعوب التونسية،
اي نعم شعوب،للأسف ماهوش شعب واحد، على كلمة وحدة و قلب واحد
نحب نقلو
مانيش بطل و مانيش خائن
لأني ببساطة لا أنتمي
يعني ما ثما حتى حزب و لا منظمة و لا أي مزرعة سعيدة تنجم تحتويني
انتمائي الوحيد هو لله ثم الوطن
الوطن الي حلمنا بيه الناس الكل مع بعضنا أيام الثورة،
وطن الحرية و الكرامة
لكن للأسف الوطن الي عايش فيه لا يعترف بهذه المبادئ
و كرامتي امتهنت لمجرد الاشتباه
الدليل الوحيد ليكم ، أيتها الشعوب كوني خائن أو بطل
هي كوني صاحب موقع anonymous.tn
الذكي الي خرج الاشاعة استند للمعلومات الي خذاها من موقع الوكالة التونسية للانترنت whois.tn
و كمل كيف دخل للموقع anonymous.tn و لقا كونو مخترق من قبل شخص يدعى فلاق قصريني
استنتج بذكاؤو الخارق كونو الموقع هو الموقع الرسمي للمنظمة العالمية أنونيموس
و كونو صاحب الموقع ما يكون كان الناموسة الي ظهر في برنامج اليوم الثامن
تحليل قوي ، و يعطي اجابة شافية للسؤال الكبير الي حير كل الشعوب التونسية، شكون ورا القناع
آماهو أحنا التوانسة نحبو الوضوح و الاجابات عن كل الأسئلة
لكن للأسف، التحليل كان تحليل سطحي و غير موضوعي
أولا نعطيكم معلومة يجهلها الكثير، أي تونسي بإمكانو باش يشري موقع تونسي .tn
ينجم يتوجه للهكابايت مثلا يهز معاه 20 دينار و بطاقة تعريفو و ياخذ أي موقع .tn الي يحب عليه،
و هاذاكا آش عملت كيف شريت anonymous.tn
استعملت حقي كتونسي فقط
بين قوسين نحب نحيي جماعة الهكابايت الي اتصلو بيا البارح و عبرو عن مساندتهم ليلي
نعطيكم أمثلة متاع مواطنين استعملو نفس الحق الي استعملتو
facebook.tn خذاه واحد اسمو خالد بالرغم كونو ما يخدمش معا شركة الفايسبوك
،gmail.tn خذاه واحد اسمو أسامة بالرغم من انو ما يخدمش مع شركة قوقل،
benali.tn فكو واحد اسمو علي
نواصلو
الي حبيت نقولو كوني موش لازم نكون « أنتمي » للمنظمة العالمية أنونيموس » باش نشري الموقع anonymous.tn
بالعربي لا أمثل لا أنا و لا موقعي لا من قريب و لا من بعيد منظمة الأنونيموس، واضح
نزيدكم زيادة،
النوابغ الي مخرجين الاشاعة، نساو باش ينشرو عنواني الالكتروني،
ما نعرفش عملوها متعمدين أو سهوا الله أعلم
عنواني البريدي هو admin@thawra.tn
تنجمو تثبتو على whois.tn
thawra.tn هو مدونتي، أول مدونة عملتها بعد الثورة، خذيتو و الكرتوش ما زال يدور
النوابغ ما تعبوش رواحهم و قراو آش كاتب فيه، لأنو النابغة التونسي لا يطالع
تنجمو تشوفو الموقع، هاتو تلاحظو بأنفسكم كوني لا أنتمي لا لنداء و لا لأي حزب آخر
للأسف الشعوب التونسية لا تبحث عن الحقيقة،
الشعوب التونسية، في أغلبها ،تبحث فقط عن الاثارة
تصدق الكذب و الإشاعة، من غير ما تعمل المادة الشخمة، بالرغم من كونو الحقيقة أوضح من الشمس
شعوب تشطح لكل من يصفقلها
يا شعوب تونس، كيفاش ترضاو بالوضع الي انتوما فيه
كيفاش ترضاو لرواحكم بعد الثورة، يقودكم الشياب و المرضى النفسانيين
راهم بكلهم طراطر (tartour.tn)
كلهم يسمعو في كلامو سيادهم، في إطار ما يسمى بهيبة دولة،
ويني سيادة الدولة
الله أعلم
في الآخر
اليوم نهار الأحد، كان عندي امتحان في صفاقس (نقرا في المرحلة الثالثة) ، ما مشيتش لأني خايف على عايلتي من تهديدات الي وصلتني من بعض المهبلة
نحب نسأل السيد وزير الداخلية، هاذا ماهوش ارهاب،و هل ستتحملون مسؤوليتكم في حمايتي و حماية عايلتي، أم أني مجرد رقم من الـ10 ملاين ،

و هل ستتحمل قناة التونسي،و العزايز الي ناوين يشدو البلاد، تبعات لعب الفروخ، و عرك السرادك متاعهم، إذا ما صارتلي حاجة ليلي و الا لعايلتي
و هل سأرى نفس الأرقام اللي شتمتني و هددتني تطلبني و تعتذر مني؟

ختاما
فبحيث البلاد مشات زيزي
و السلام عليكم السلام عليكم السلام عليكم

Leave a Reply

You must be logged in to post a comment.